Паэтычна-музычная гасцёўня «Як зрабілася, што пакахаў цябе я…»

2813

9 снежня споўнілася 125 год з дня нараджэння Максіма Багдановіча. Напярэдадні свята ў цэнтральнай гарадской бібліятэцы імя А.І. Герцэна прайшла паэтычна-музычная гасцёўня «Як зрабілася, што пакахаў цябе я…»

Асоба Максіма Багдановіча займае адметнае месца ў беларускай літаратуры і культуры. Выдатны паэт, бліскучы перакладчык, тонкі літаратурны крытык, глыбокі даследчык і тэарэтык літаратуры. Яго вершы стала займаюць адно з першых месцаў у рэйтынгу любімых з вывучаных на памяць яшчэ ў школе. Максім Багдановіч пражыў вельмі кароткае, але надзвычай плённае жыццё. Імпульсам да творчасці служыла для яго многае, у тым ліку і жанчыны. Жаночым вобразам у творчасці Максіма Багдановіча і была прысвечана гасцёўня.

Навучэнцы УА «Гомельскае дзяржаўнае вучылішча алімпійскага рэзерву», УА «Гомельскі дзяржаўны політэхнічны каледж» і УА «Гомельскі дзяржаўны аграрна-эканамічны каледж» пазнаёміліся з жыццём і творчасцю паэта. Госці змаглі паўдзельнічаць у цікавых конкурсах, праявіць свае здольнасці ў валоданні беларускай мовай, паразважаць, што такое каханне: апісаць свае асацыяцыі, працытаваць выказванні вялікіх людзей на тэму кахання. На вечарыне прагучалі вершы паэта, песні на яго вершы «Слуцкія ткачыхі», «Зорка Венера». Навучэнцы паглядзелі відэастужкі пра Максіма Багдановіча.