Грачанікаў Анатоль Сямёнавіч (08.09.1938, в.Шарпілаўка Гомельскага раёна Гомельскай вобласці - 07.03.1991, Мінск) - паэт і перакладчык.
Анатоль Сямёнавіч Грачанікаў – беларускі паэт і перакладчык, літаратурный крытык. З 1965 год − член Саюза пісьменнікаў СССР. Лаўрэат прэміі Ленінскага камсамола Беларусі (1974) за зборнік вершаў «Грыбная пара», Дзяржаўнай прэміі БССР (1984) за кнігі вершаў «Палессе», «Валерка і лятаючая талерка», «Казка пра Івана-ганчара і пачвару цара».
У 1960 годзе кончыў Беларускі інстытут інжынераў чыгуначнага транспарту у Гомелі, у 1969 годзе – Вышэйшыя літаратурныя курсы ў Маскве.
Працаваў інжынерам на Гомельскім рамонтна-механічным заводзе (1960—1962), намеснікам загадчыка аддзела прапаганды і агітацыі Гомельскага абкома камсамола (1962—1965), першым сакратаром Гомельскага гаркома камсамола (1965—1967). З 1969 года − супрацоўнік рэдакцыі штотыднёвіка «Літаратура і мастацтва», загадчык аддзела літаратуры, з 1971 − намеснік старшыні праўлення Саюза пісьменнікаў БССР, з 1976 − галоўны рэдактар часопіса «Вясёлка», з 1978 − часопіса «Бярозка», з 1982 − часопіса «Маладосць».
Друкавацца пачаў з 1957 года. Першая кніга вершаў «Магістраль» выйшла ў свет у 1964 годзе. Аўтар зборнікаў паэзіі «Круглая плошча» (1971), «Грыбная пара» (1973), «Начная змена» (1975), «Дрэва на выспе» (1977), «Калі далёка ты...» (выбраная лірыка, 1979), «Палессе» (1983), «Верасень» (1984), «Я вас люблю...» (1986), «Жнівень-45» (1990). Напісаў кніжку сатыры і гумару «Школа танцаў» (1988).
Выдаў кніжкі для дзяцей «Казка пра Івана-ганчара і пачвару цара» (1980), «Валерка і лятаючая талерка» (1983), «Жывая вада» (казкі, 1985), «Зорны палёт» (вершы, казкі, легенды, 1988). З'яўляецца лаўрэатам рэспубліканскага конкурсу на лепшы літаратурны твор для дзяцей і юнацтва, прысвечанага 60-годдзю ўтварэння СССР (1982, за зборнік вершаў "Планета дзяцей").
У 1988 г. выйшла «Выбранае» А. Грачанікава.
Творам А. Грачанікава характэрны шырокі тэматычны дыяпазон, глыбіня думкі. Вершы, балады і паэмы А. Грачанікава адрозніваюцца высокай моўнай культурай, гарманічным адзінствам зместу і формы. Многія яго вершы сталі песнямі.
Выданы на рускай мове зборнік паэзіі «Звезды и курганы» (Масква, 1976) адзначаны прэміяй на Усесаюзным літаратурным конкурсе імя М. Астроўскага (1978).
А.С. Грачанікаў пераклаў на беларускую мову зборнік паэзіі Зульфіі «Такое сэрца ў мяне» (з Э. Агняцвет, 1985), кнігі вершаў для дзяцей сучасных афганскіх паэтаў «Ватан - значыць Радзіма» (1987), М. Пацхішвілі «Рагатун і рагатуха» (1989), а таксама асобныя творы рускіх, украінскіх, малдаўскіх, літоўскіх, сярэднеазіяцкіх паэтаў і паэтаў замежных славянскіх краін.
Кнігі А. Грачаннікава з аўтогафамі захоўваюцца у музеі автографа Гомельскай цэнтральнай гарадской бібліятэкі ім. А.І. Герцэна.