Валерый Мікалаевіч Гапееў – беларускі пісьменнік, журналіст, лаўрэат літаратурнай прэміі імя В. Калеснікава за кнігу «Пастка на рыцара» (2002 г.).

Нарадзіўся ў сялянскай сям'і. Вучыўся ў Балатнянскай сярэдняй школе, потым — у Мінскім электратэхнікуме сувязі (цяпер — каледж сувязі) па спецыяльнасці «радыёсувязь і радыёвяшчанне». Працаваў майстрам у вучылішчы ў Казахстане, служыў у арміі (1982—1984). Пасля працаваў на мінскім «Інтэграле».

У 1992 годзе пераехаў з сям'ёй у Івацэвічы, працаваў на заводзе. У гэты ж час стаў пісаць прозу. Першае сур'ёзнае апавяданне «Абсалютнае жаданне» было надрукавана ў часопісе «Маладосць». Часопіс «Крыніца» надрукаваў дэтэктыў на рускай мове «…И два в остатке». Невялікія карацелькі (сатырычныя гумарэскі) друкаваліся ў газетах. Працаваў у раённай газеце ў якасці пазаштатнага карэспандэнта.

У 1995 годзе быў запрошаны на працу карэспандэнтам у новаствораную «Газету Уладзіміра Кудзінава» (пасля — «Газета для вас»). У 1997 годзе перайшоў на працу ў раённую газету «Івацэвіцкі веснік».

Ён адзін з нямногіх беларускіх аўтараў, якія пішуць для дзяцей і падлеткаў. Яго кнігі «Пастка на рыцара» і «Урокі першага кахання» (2010 г.) сталі свайго роду бестселерамі айчыннай літаратуры. Аповесці і апавяданні Валерыя Гапеева пастаянна публікуюцца ў часопісах «Маладосць», «Полымя», штотыднёвіку «Літаратура і Мастацтва». Праз праблемы, апісаныя ў кнігах Валерыя Гапеева, праходзіў кожны: першае каханне, здрада, цяжкасць выбару, пошук сябе.